pavitra portal result zp teacher Result

शिक्षक यादी जाहीर 9128 पदांची यादी पवित्र पोर्टलवर,

13 ते 21 ऑगस्ट या काळात कागद पडताळणी 

राज्यात तब्बल नऊ वर्षांपासून रखडलेल्या शिक्षक भरतीला अखेर मुहूर्त मिळाला असून पवित्र पोर्टलवरूनच राज्यात 12 हजार 140 शिक्षकांची भरती प्रक्रियेला प्रारंभ झाला आहे. मुलाखतीशिवाय भरतीसाठी जाहिरातीनुसार उपलब्ध असलेल्या 5 हजार 822 पदांची यादी पवित्र पोर्टलवर शुक्रवारी सायंकाळी 5 वाजता जाहीर करण्यात आली आहे.

येत्या 13 ते 21 ऑगस्ट या काळात उमेदवारांची कागदपत्रे पडताळणी होणार आहे. गेली दोन वर्ष चर्चेत असलेली शिक्षक भरती पवित्र पोर्टलद्वारे घेण्याची घोषणा होऊनही जवळपास प्रशासकीय तर कधी तांत्रिक बाबींमध्ये अडकलेली पहायला मिळत होती. ही प्रक्रिया कधी पूर्ण होते याकडे उमेदवारांचे लक्ष लागले होते. अखेर शालेय शिक्षण मंत्री अशिष शेलार यांनी वारंवार बैठका घेवून हा प्रश्‍न मार्गी लावला आहे. शिक्षक आमदार, संघटना, प्रशासन आदी बाबत वारंवार यामधील चर्चा करुन अखेर पहिली यादी जाहीर करण्यास यश मिळाले आहे. राज्यात 12 हजार 140 पदे भरली जाणार आहेत. त्यापैकी मुलाखतीशिवाय 9 हजार 128 पदे भरली जाणार आहेत. शुक्रवारी पवित्र पोर्टलच्या संकेतस्थळावर मुलाखतीशिवायचा प्राधान्यक्रम दिलेल्या उमेदवारांना त्यांनी निवडलेल्या प्राधान्य क्रमानुसार संस्थांसाठीच्या उमेदवारांची अंतिम 9 हजार 128 पदांच्या पैकी 9080 पदे मुलाखती शिवाय भरतीसाठी उपलब्ध होती. त्यापैकी 5 हजार 822 पदासाठी निवड यादी जाहीर करण्यात आली त्यापैकी 3 हजार 258 पदे रिक्‍त राहिली आहेत. 5 हजार 822 पदापैकी जिल्हापरिषदेतील 3530, महानगरपालिकेतील 1053, नगरपालिकेतील 172 व खासगी प्राथमिक शाळांमधील 1067 उमेदवारांची निवड सूची जाहीर करण्यात आली आहे. त्यांना 13 ते 21 ऑगस्ट या काळात कागदपत्र पडताळणी होणार आहे. जिल्हा परिषदेच्या शाळांसाठी मुख्य कार्यकारी अधिकारी योंच्या अध्यक्षेतेखाली, नगरपरिषद, नगरपालिकेच्या शाळांसाठी प्राधिकार्‍यांच्या अध्यक्षेतेखाली व खासगी शैक्षणिक संस्थेच्या शाळांसाठी शाळा समिती मार्फत कागदपत्रांची पडताळी करण्यात येणार आहे. शासकीय, स्थानिक स्वराज्य संस्था, अनुदानित संस्थासाठी विद्यार्थ्यांना स्वतंत्र प्राधान्यक्रमाची प्रक्रिया झाली होती. उमेदवारांनी प्राधान्यक्रम भरण्याची प्रक्रिया पूर्ण करून आपली संपूर्ण माहिती पवित्र पोर्टलवर भरलेली होती. त्यानुसार ही यादी जाहीर केली आहे. मुलाखतीशिवाय जागा भरण्यामध्ये रिक्‍त राहण्याचे प्रमाणही अधिक राहिले असल्याचे दिसून येत आहे. इयत्ता सहावी ते आठवी या गटात मुख्यत्वे इंग्रजी गणित व विज्ञान विषयाकरिता अर्हता प्रात्प उमेदवार उपलब्ध झाले नाहीत. त्यामुळे 2392 पदे रिक्‍त राहिली आहेत.

मराठी माध्यमाच्या शाळांमधील 2311, उर्दू माध्यमाच्या शाळांमधील 697, इंग्रजी माध्यमाच्या शाळांमधील 237 पदावर पात्र उमेदवार मिळालेले नाहीत तसेच हिदी 27, कन्‍नड 12 आणि पालिकेच्या हिंदी माध्यमाची 13 अशीही पदे या यादीत रिक्‍त राहिली आहेत. यामध्ये आरक्षण निहाय अनुसूचित जाती प्रवर्गातील 369, इतर मागासवर्गीय 301, एसईबीसी 232, इडब्लूएस 161, खुल्या गटातील 116, भटक्या जमाती ब, क, व ड प्रवर्गातील 227, विमुक्‍त जाती प्रवर्गा 81 आणि विशेष मागास प्रवर्गातील 65 पदावर उमेदवार उपलब्ध झालेले नाहीत.