राज्यातील 833 सहायक मोटार वाहन निरीक्षकांची निवड रद्द महाराष्ट्र लोकसेवा आयोगाकडून वर्षभरापूर्वी घेतलेल्या मोटार वाहन निरीक्षकांच्या परीक्षेतून निवड झालेल्या 833 सहायक मोटार वाहन निरीक्षणाची निवड मुंबई उच्च न्यायालयाने रद्दबातल केली आहे. निवड झालेले सर्व विद्यार्थी अभियांत्रिकी शाखेचे होते. शासन व आयोगाचा भोंगळ कारभार या विद्यार्थ्यांचे भवितव्य उद्ध्वस्त करणारा ठरला.
जानेवारी 2017 मध्ये झालेल्या सहायक मोटार वाहन निरीक्षक पदाच्या परीक्षेसाठी राज्यभरातून 70 हजार विद्यार्थ्यांनी अर्ज केले होते.
पूर्व व मुख्य परीक्षा उत्तीर्ण होऊन निवड झालेल्या विद्यार्थ्यांना आयोगाने शिफारसपत्रेही पाठवली होती. 14 जून 2018 रोजी उमेदवारांना कागदपत्रे पडताळणीसाठी बोलावण्यात आले होते. मात्र 12 जून रोजी उच्च न्यायालयाने निवड झालेल्या उमेदवारांची निवड जुन्या अटींची पूर्तता करत नसल्याच्या कारणास्तव रद्द ठरवली.
राज्याच्या परिवहन विभागामध्ये एकूण 5100 पदांमधून 2256 पदे रिक्त आहेत.
मोटार वाहन निरीक्षकांच्या मंजूर 867 पदांपैकी 373 पदे रिक्त आहेत.
सहायक मोटार वाहन निरीक्षकांच्या मंजूर 1302 पदांपैकी 1008 पदे रिक्त आहेत.